კაკაბეთის მარანი

კაკაბეთის მარანი მდებარეობს კახეთში, საგარეჯოს რაიონში, სოფელ კაკაბეთში. თბილისიდან ჩამოსასვლელად დაგჭირდებათ 50 წუთი. მარანი, რომელიც 30 წელს ითვლის, ეკუთვნის მასურაშვილების საცხოვრებელ სახლს და განთქმულია სტუმართმოყვარეობით. ამიერიდან კი ჩვენი კარი ღიაა ყველასთვის, ვისაც უყვარს სიმშვიდე, ბუნებასთან ახლოს ყოფნა, გემრიელი კერძები და საუკეთესო ღვინო!

ჩვენს მარანში დაგხვდებათ: ულამაზესი, სიმწვანეში ჩაფლული ეზო ჰამაკებით; სტუმრებისთვის შექმნილი გარე სივრცით, რომელსაც მრავალფეროვანი ხეხილი, ეგზოტიკული სახეობის მცენარეები, ყვავილები, კივის ხეივანი განსაკუთრებულ ელფერს სძენს. ვიზიტორებს ულამაზესი ხედის გარდა ადგილობრივი ტრადიციებით აგებულ სახლში მასპინძლობას, ადგილობრივი წარმოების კვების პროდუქტებით კვებას და სოფლის ცხოვრებაში მონაწილეობას სთავაზობენ. აქ შეგიძლიათ დიასახლისთან ერთად ჩააკრათ პური თონეში, მოახვიოთ ხინკალი, გაავლოთ ჩურჩხელა, დაწუროთ ყურძენი, შეწვათ მწვადი საკუთარი ხელით, გამოკვებოთ ხოხბები... შეუძლებელია არ აღფრთოვანდეთ მარნის სივრცით, რომელიც სავსეა საუკუნოვანი ისტორიის მქონე ეთნოგრაფიული ნივთებით, მასურაშვილების დედის ხელით შექმნილი ფარდაგებით. დაგახვედრებთ ბუხარში მოგიზგიზე ცეცხლს და სასიამოვნო მუსიკას...