უძირო ტბის საფეხმავლო მარშრუტი იწყება სოფელი შოვიდან, სასტუმრო სანსეთ შოვამდე დაახლოებით 1 კილომეტრში. გზაზე გაკეთებული მონიშვნის ბოძი ზუსტად მიგანიშნებთ როგორც ბილიკის მიმართულებას, ისე მანძილსა და ლაშქრობისთვის საჭირო დროს დანიშნულების წერტილებამდე. აღსანიშნავია, რომ მარშრუტის სრულად არის მონიშნული, როგორც ტყიან, ასევე ალპურ მონაკვეთებზე, ისე რომ გზის აბნევა ფაქტობრივად წარმოუდგენელია.

დასაწყისშივე ბილიკი შედის ტყეში, მიუყვება ციცაბო ფერდობს და მკვეთრად კრეფს სიმაღლეს. გასათვალისწინებელია, რომ წყლის მომარაგება მარშრუტის საწყის წერტილზე არსებულ წყაროსთან სჯობს, რადგან შემდგომი 2 საათის განმავლობაში წყალს ვერ შეხვდებით, ვიდრე ბილიკი ხეობის შუაწელთან მდინარეს არ მიუახლოვდება. ტყიდან გასვლისას, მას შემდეგ რაც ალპურ ზონაში გადაინაცვლებთ, ბილიკი სწორდება და მიუყვება ხეობის შუაწელს, მდინარის სათავისკენ, მის მარცხენა ნაპირზე. ხეობის ქვაბულის მიღწევის შემდეგ, ბილიკი მართობულად უხვევს მარჯვნივ და უღელტეხილისკენ მიიწევს. უღელტეხილი კატიწვერასა და დოლომისისწვერის მთებს შორის გადადის და პირდაპირ უძირო ტბისკენ ეშვება. უღელტეხილიდან ტბამდე მანძილი დიდი არაა, თუმცა რთული რელიეფისა და კლდის ნაშალის გამო, ტბამდე მისაღწევად დაახლოებით ერთი საათი დაგჭირდებათ. პირველ დღეს ჯამში 6-7 საათი მოგიწევთ ფეხით სიარული. იშვიათი გამონაკლისების გარდა გზად აღმართია და საკმაოდ დამღლელიც.

ტბასთან მისვლის შემდეგ თქვენს თვალწინ გადაიშლება ულამაზესი ხედი რაჭის კავკასიონსა და მდინარე ჭანჭახის ხეობაზე, კარგ ამინდში კი სვანეთის მწვერვალების დანახვასაც შეძლებთ. კამკამა ტბის ზედაპირზე მის თავზე წამოყუდებული მწვერვალების მიმზიდველი სილუეტები აირეკლება, რაც მნახველს განსაკუთრებით ხიბლავს და ამაღლებულ განწყობას უქმნის.

ბანაკის გაშლა შესაძლებელია ტბასთანაც, თუმცა თუ ავდარია მოსალოდნელი ტბის მარცხენა მხარეს, შედარებით შემაღლებულ ადგილზე დაბანაკებას გირჩევთ, რათა წვიმის დროს მთებიდან ჩამოდინებული წყალი კარვებში არ შემოგივარდეთ.

მეორე დღის ნახევარზე მეტი შეგიძლიათ გარემოთი ტკბობას, დროსტარებასა და ფოტოების გადაღებას მიუძღვნათ. აუცილებლად აირბინეთ ტბის მარჯვენა მხარეს ფერდობზე საიდანაც განსაკუთრებული სილამაზით იშლება როგორც საკუთრივ უძირო ტბის, ასევე კავკასიონის თვალშეუდგამი მწვერვალების ხედები.

ვინაიდან მარშრუტი წრიულია, დაბრუნებისას იგივე გზის გავლა არ მოგიწევთ. ტბიდან მარჯვნივ მცირე აღმართზე ასვლის შემდეგ, ბილიკი ეშვება სოფელ გლოლაში, სადამდეც 9 კმ-ია და მის გასავლელად 3-4 საათი იქნება საჭირო.