მურყმელის წმინდა ბარბარეს ეკლესია

მურყმელის წმინდა ბარბარეს ეკლესია სვანეთში, მესტიის მუნიციპალიტეტის სოფელ მურყმელში მდებარეობს. იგი XI-XII საუკუნეებით თარიღდება. იგი დარბაზულ ნაგებობას წარმოადგენს, აღმოსავლეთით სწორკუთხედში ჩაწერილი ნახევარწრიული აფსიდითა და სამხრეთის მინაშენით. საკურთხეველი დარბაზისგან გვიანდელი ქვის კანკელითა და კედლითაა გამოყოფილი. სატრიუმფო და დასავლეთ კედლის თაღები შეკიდულია. ინტერიერი სრულიად სადაა, მთლიანად შებათქაშებული. ეკლესია ორი სარკმლით ნათდება, ერთი სარკმელი დასავლეთ კედელშია გაჭრილი, ერთი კი - აღმოსავლეთისაში. შესასვლელი ერთია, სწორკუთხა, სამხრეთის მხრიდან. მინაშენიდან დარბაზში შესასვლელად ორი საფეხურის ავლაა საჭირო, შემდეგ კი ერთი საფეხურით ქვემოთ ჩავდივართ. შემორჩენილია ძველი, მასიური ხის, მინაშენის მხრიდან სქელი ლითონის ფირფიტებით შეჭედილი კარი. მინაშენი, ზომით, ეკლესიაზე ოდნავ დიდია და მასზე ბევრად დაბალი. იგი შეუბათქაშებელია და ცალფერდა სახურავითაა გადახურული. მინაშენის აღმოსავლეთ და დასავლეთ კედლებში, თითო ღრმა, მართკუთხა ნიშაა. მინაშენს სამხრეთიდან სწორკუთხა შესასვლელი აქვს. ეკლესიის ფასადები სრულიად სადაა. დასავლეთი და ჩრდილოეთ ფასადები მთლიანად შებათქაშებულია. ტაძარი ნაგებია შირიმის კვადრებით, მინაშენი კი ფიქლით.