ახიბოხის ფანჯარა

ახიბოხის ფანჯარა აფხაზეთში, გუდაუთის მუნიციპალიტეტში მდებარეობს, ბზიფის ქედის შუა ნაწილის თხემზე, ზღვის დონიდან 2400 მეტრზე (აფხაზეთის ტერიტორია ამჟამად ოკუპირებულია რუსეთის მიერ). იგი კირქვის კლდეებში გახსნილი გამჭოლი ბუნებრბივი გვირაბია, რომელიც განადგურებული კარსტული მღვიმის ფრაგმენტს წარმოადგენს. “ფანჯრიდან” შესანიშნავი ხედები იშლება: ერთ მხარეს - აფხაზეთის სანაპირო, შავი ზღვა, და პონტოს ქედის ნაწილი, მეორე მხარეს კი - აფხაზეთის კავკასიონის მწვერვალები. ახიბოხის ფანჯარასთან მისასვლელად საკმაოდ რთული და გრძელი სალაშქრო ბილიკის გავლაა საჭირო, იგი განსაკუთრებით მიმზიდველია ველური ბუნებისა და თავგადასავლების მოყვარულთათვის. სახელწოდება “ახიბოხ” მთავრის მთას ნიშნავს, ამ მთის ირგვლივ მდებარე საზაფხულო საძოვრები აფხაზთა ძველი მთავრების - შერვაშიძეების საკუთრება იყო. კირქვის კლდეებში გახსნილი ბუნებრივი გვირაბი შორიდანვე მოჩანს და ეგზოტიკურ სანახაობას ქმნის. ახიბოხის ფანჯარა საქართველოს ერთ-ერთი შთამბეჭდავი და საინტერესო ბუნების ძეგლია.