ბაბუშერას კოშკი

ბაბუშერას კოშკი აფხაზეთში, გულრიფშის მუნიციპალიტეტის სოფელ ბაბუშერაში მდებარეობს. აფხაზეთის ტერიტორია დღესდღეობით ოკუპირებულია რუსეთის მიერ. იგი XVI-XVIII საუკუნეებით თარიღდება. ძეგლმა ჩვენამდე ძალიან დაზიანებული სახით მოაღწია, კედლები მხოლოდ სამი მეტრის სიმაღლეზეა შემორჩენილი. კოშკი გეგმაში წრიული მოხაზულობისაა. ნაგებობის დიდი ნაწილი მიწაშია ჩაფლული და გაწმენდას საჭიროებს. კედლების შემორჩენილ ნაწილზე ჩანს სათოფურები და თიხის მილები, სართულშუა გადახურვა ჩაქცეულია. კოშკის შიდა დიამეტრი 4 მეტრს აღწევს, კედლების სისქე კი 1.5 მეტრია. ბაბუშერას კოშკი ნაგებია რიყის ქვით კირის დუღაბზე.