გეგელიძეების მეჩეთი

🕌 გეგელიძეების ხის მეჩეთი 1880-1900 წლებს შორის აიგო ჩვენთვის უცნობი ოსტატების მიერ, თუმცა მეჩეთის აივანზე, მიჰრაბსა და შესასვლელში შემორჩენილ ხის ძელებზე არსებული ნაკვეთი ორნამენტები მათი ოსტატობის მაღალ ხარისხზე მიგვითითებენ. იგი აჭარაში, ქედის მუნიციპალიტეტში მდებარეობს.

🕌 საბჭოთა კავშირის სხვადასხვა დროს მეჩეთს მაღაზიად, საწყობად და სკოლად იყენებდნენ.

🕌 გეგელიძეების მეჩეთმა საკუთარ თავზე გამოსცადა ადგილობრივი მოსახლეობის მიერ მკაცრი კლიმატური პირობებისგან ძეგლის დაცვის მიზნით თვითნებური ჩარევა, გადაღებვა, პლასტმასის კარ-ფანჯრისა და პოლიურეთანის ქაფით დაფარვა. ამ ჩარევის შედეგად ინტერიერის თავდაპირველი მოხატულობა და ხეზე ნაკვეთი ორნამენტები მერქანბურბუშელას ფილებით დაიფარა.

🕌 ძეგლის მიჰრაბი, აივანი და შესასვლელი გამოირჩევა ხეზე ამოკვეთილი ტიტის ფორმის და სხვა ყვავილოვანი ორნამენტებით, ხოლო ბოძები და კარნიზები ზიგზაგებით, გეომეტრიული ნაყშებითა და სხვა ორნამენტებითაა გაფორმებული. გეგელიძეების მეჩეთის გუმბათის მხატვრობა ტრადიციულია: კომპოზიციაში გამოყენებულია მეცხრამეტე საუკუნის ბოლოსთვის დამახასიათებელი მოტივები ყვავილის წნულები, ქსოვილის გირლიანდები და მედალიონები.