გოხნარის ლიპარიტ ორბელიანის ეკლესია

გოხნარის ლიპარიტ ორბელიანის ეკლესია ქვემო ქართლის მხარეში, თეთრიწყაროს მუნიციპალიტეტის სოფელ გოხნართან მდებარეობს. იგი XI საუკუნის მეორე ნახევრით თარიღდება. იგი რაბაზულ ნაგებობას წარმოადგენს სამხრეთის მინაშენით, რომელიც ეკლესიის სამხრეთ კედელს მთელ სიგრძეზე ეკვრის. მინაშენი ამჟამად დანგრეულია. დარმაზი აღმოსავლეთით სწორკუთხედში ჩაწერილი ნახევარწრიული აფსიდით სრულდება. ეკლესია გადახურულია ცილინტრული კამარით, რომელიც პილასტრებზე დაყრდნობილ საბჯენ თაღებს ეყრდნობა. შიდა სივრცე ვიწროა და აზიდული. ეკლესიის სამხრეთ ფასადზე ოთხი, დენადი ფორმის კრონშტეინია შემორჩენილი, რომლებზედაც მინაშენის ცილინდრული კამარა გადადიოდა. ეკლესია აგებულია ბაზალტის კარგად თლილი დიდი კვადრებით. ინტერიერში აქა-იქ შერჩენილია ნალესობის კვალი და მოხატულობის ნიშნები. შესასვლელი ერთია - სამხრეთით. კარის ბალავრის ქვაზე ამოკვეთილ სამშენებლო ასომთავრულ წარწერაში მოიხსენიება ლიპარიტ ერისთავთ-ერისთავი ორბელიანი და მისი შვილები რატი და იოანე. ეკლესია გარშემოვლებული იყო გალავნით, მისი ნანგრევები ჩანს სამხრეთ-დასავლეთით. ტაძრის მახლობლად ჩანს ნასახლარის ნაშთები.