გონის წმ. გიორგის ეკლესია

გონის წმ. გიორგის ეკლესია ლეჩხუმში, სოფელ ორხვის მიმდებარედ მდებარეობს. იგი X საუკუნით თარიღდება. ეკლესია დარბაზულ ნაგებობას წარმოადგენს, აღმოსავლეთით ნახევარწრიული აფსიდით. დარბაზი გადახურულია კამარით. სატრიუმფო თაღი ბურთულებით დეკორირებულ იმპოსტებს ეყრდნობა. ტაძარი სუსტადაა განათებული სამი სარკმლით. ინტერიერში შემორჩენილია შელესილობისა და მოხატულობის ფრაგმენტები. განსაკუთრებულ ყურადღებას იქცევს ჩუქურთმებითა და რელიეფებით შემკული კანკელი, რომელიც უხვი და დახვეწილი მორთულობით გამოირჩევა. კანკელზე გვხვდება ორნამენტები, მახარომელთა და მთავარანგელოზთა ფიგურები და ასომთავრული წარწერა. საინტერესოა ნაგებობის საფასადო დეკორიც - ჯვრებითა და გეომეტრიული ორნამენტებით შემკული სარკმლების საპირეები. საყურადღებო არქიტექტურულ დეტალს წარმოადგენს სამხრეთის ფასადზე, კარნიზის ქვემოთ მოთავსებული, კედლიდან ძლიერ ძლიერად გამოწეული კრონშტეინები. ეკლესიას ორი შესასვლელი აქვს - დასავლეთითა და სამხრეთით. დასავლეთის შესასვლელი გარედან არქიტრავულია, შიგნიდან კი - თაღოვანი, ასეთივე უნდა ყოფილიყო სამხრეთის კარიც. ტაძარი ნაგებია სუფთად თლილი შირიმის კვადრებით.