ჯვარის წმინდა გიორგის ეკლესია

ჯვარის წმ. გიორგის ეკლესია სამეგრელოში, წალენჯიხის მუნიციპალიტეტში, ქალაქ ჯვარში მდებარეობს. იგი XI საუკუნით თარიღდება. ძეგლი ძალიან დაზიანებული სახითაა შემორჩენილი. ტაძარი გეგმით მარტივ ტრიკონქს წარმოადგენს. ეკლესია აღმოსავლეთის, დასავლეთისა და სამხრეთის სამ-სამი სარკმლით იყო განათებული. აფსიდებისა და დასავლეთის მკლავის შერწყმის ადგილებზე პროფილირებული პილასტრებია, რომელზეც გუმბათი იყო დაყრდნობილი. დასავლეთის მკლავის გრძივი კედლების შუაში ორსაფეხურიანი პილასტრებია, მათზე გადასულ სამ თაღს ეყრდნობოდა მკლავის ცილინდრული კამარა. ნაგებობას თავისი ეპოქისთვის დამახასიათებელი მორთულობა ჰქონდა. შესასვლელი სამია - დასავლეთით, სამხრეთითა და ჩრდილოეთით. სამხრეთის შესასვლელს პროფილირებული მოჩარჩოება ჰქონდა. ტაძარი გარედან კარგად დამუშავებული, შიგნიდან კი ნახევრად დამუშავებული კვადრებითაა მოპირკეთებული.