ხოშატიანის ღვთისმშობლის ეკლესია

ხოშატიანის ღვთისმშობლის ეკლესია კახეთში, ლაგოდეხის მუნიციპალიტეტის სოფელ ხოშატიანში მდებარეობს. იგი გვიანი შუასაუკუნეებით თარიღდება. ეკლესია დარბაზულ ნაგებობას წარმოადგენს, აღმოსავლეთით სწორკუთხედში ჩაწერილი ნახევარწრიული აფსიდით. საკურთხევლის აფსიდი ერთი საფეხურითაა შემაღლებული. კამარა ლიპასტრებზე გადაყვანილ თაღებს ეყრდნობა. ეკლესიას სამი თაღოვანი სარკმელი აქვს - თითო აღმოსავლეთით, დასავლეთითა და სამხრეთით. შესასვლელი ერთია - დასავლეთით. ფასადები სადაა. კედლებს ასრულებს აგურის რამდენიმე საფეხურიანი ლავგარდანი. ინტერიერში შემორჩენილია მოხატულობის ძალიან დაზიანებული ფრაგმენტები. დასავლეთიდან ტაძარს სამრეკლო აქვს მიშენებული. სამრეკლოს ქვედა ნაწილი კუბურ მოცულობას წარმოადგენს, ორი სწორკუთხა შესასვლელითა და ერთი სარკმლით, სწორედ აქედანაა ეკლესიაში შესვლა შესაძლებელი. ზედა ნაწილი რვაწახნაგა, ყოველი მხრით თაღებით გახსნილი ფანჩატურია. ეკლესიაცა და სამრეკლოც ნაგებია რიყის ქვითა და აგურით.