ხოტევის მთავარანგელოზის ეკლესია

ხოტევის მთავარანგელოზის ეკლესია რაჭაში, ამბროლაურის მუნიციპალიტეტის სოფელ ხოტევში მდებარეობს. იგი XVII საუკუნით თარიღდება. სოფელი ხოტევი თავად წულიკიძეთა სამფლობელო ყოფილა, ხოტევის ეკლესია კი თავად მერაბ წულუკიძეს აუგია. ეკლესია თავიდან უგუმბათო იყო. ტაძრის ინტერიერი მთლიანად მოხატული ყოფილა. ფრესკები აღწერილი აქვთ მარი ბროსესა და ექვთიმე თაყაიშვილს, აქ გამოსახული ყოფილა მერაბ წულიკიძის, მისი მეუღლის მარეხის, დათუნა წულუკიძის და ლოლოიძის ქალის პორტრეტები. ხოტევის ეკლესია 1924 წელს, ანტირელიგიური პროპაგანდის დროს დაუნგრევიათ. ტაძრის წარწერებიანი და მოხატულობიანი ქვები სკოლის მშენებლობისას გამოუყენებიათ. ეკლესია მოგვიანებით აღადგინეს. ამჟამად იგი თავისუფალი ჯვრის ტიპის ჯვარ-გუმბათოვან ნაგებობას წარმოადგენს. დასავლეთის მკლავის სახურავის კეხზე სამრეკლო-ფანჩატურია აღმართული. შესასვლელები და სარკმლები შემკულია XX საუკუნისთვის დამახასიატებელი დეკორატიული მოტივებით. ტაძარი (გარდა გუმბათისა) გარედან შეთეთრებულია. ფასადებს სადა ლავგარდანი შემოუყვება. ეკლესია ნაგებია თლილი ქვით.