კურსების ზენობნის ეკლესია

კურსების ზენობნის ეკლესია იმერეთის მხარეში, ტყიბულის მუნიციპალიტეტის სოფელ კურსებში მდებარეობს. იგი XII საუკუნით თარიღდება. იგი დარბაზულ ნაგებობას წარმოადგენს, აღმოსავლეთით ნახევარწრიული აფსიდით, რომელიც სწორკუთხედშია მოქცეული. ტაძარს დასავლეთით მინაშენი აქვს, რომელიც მთავარი ნაგებობაზე დაბალია, დაახლოებით მისი ნახევარი სიმაღლისაა. ეკლესიას ორი შესასვლელი აქვს - სამხრეთითა და დასავლეთით, ორივე მათგანი გარედან სწორკუთხაა, შიგნიდან - თაღოვანი. მინაშენს დასავლეთიდან სწორკუთხა შესასვლელი აქვს და მისი გავლით მთავარ დარბაზში მოხვედრაა შესაძლებელი. ტაძრის კამარა პილასტრებზე გადაყვანილ თაღებს ეყრდნობა. პილასტრებს ჩუქურთმებით შემკული კაპიტელები ასრულებს. მინაშენის შესასვლელსა და ეკლესიის დასავლეთ სარკმელს მოჩუქურთმებული სათაურები აქვს. ორივე სათაური ჯვრისა და გეომეტრულ-მცენარეული ორნამენტით შემკული თაღისგან შედგება. ნაგებობას თაღოვანი სარკმლები აქვს, რომლებიც ლილვებისგან შექმნილი სადა საპირეებითაა მოჩარჩოებული. სამხრეთისა და ჩრდილოეთის ფასადების ზედა ნაწილში, ლავგარდნის გასწვრივ გვხვდება ცხოველთა ქანდაკისებური ფიგურები. ფასადებს თაროსებრი ლავგარდანი ასრულებს. ტაძრის ინტერიერი შელესილი და მოხატულია. ფრესკები უკეთ არის შემონახული საკურთხეველში. კურსების ზენობნის ეკლესიას გალავანი ევლება, რომელშიც სამრეკლო-კარიბჭეა ჩაშენებული.