კვაუთის კომპლექსი

კვაუთის კომპლექსი - ციხე და მთავარანგელოზის სახელობის ეკლესია სამეგრელოში, სენაკის მუნიციპალიტეტის სოფელ კვაუთში მდებარეობს. იგი IV-VI საუკუნეებით თარიღდება. კომპლექსი მოიცავს ციხესა და მთავარანგელოზის სახელობის ეკლესიას. ნაგებობები ძალიან დაზიანებული იყო, თუმცა ტაძარი ამჟამად აღდგენილია. ციხეს ოვალური ფორმა აქვს და ჩრდილოეთ მხრიდან ციცაბო კლდეზეა მიბჯენილი. კედლები მოგვიანებით მიშენებული კონტრფორსებითაა გამაგრებული. სიმაგრის ცენტრალურ მონაკვეთში დიდი ზომის დარბაზული ეკლესია დგას. დარბაზი აღმოსავლეთით ნახევარწრიული შვერილი აფსიდით სრულდება. საკურთხეველი ერთი საფეხურითაა ამაღლებული. ინტერიერი ექვსი სარკმლით ნათდება, აღმოსავლეთითა და დასავლეთით თითო სარკმელია, გრძივ კედლებში კი - ორ-ორი. ტაძრის კედლების ქვებზე გვხვდება ორნამენტების და ბუნებრივი საღებავების კვალი, რომლებიც, როგორც ჩანს, ტაძრის განახლების შემდეგ მეორადად არის გამოყენებული. ფასადებს ლილვისა და წრეთარგისგან შექმნილი ლავგარდანი ასრულებს. ნაგებობას სამი შესასვლელი აქვს - დასავლეთით, სამხრეთითა და ჩრდილოეთით. ეკლესია მოპირკეთებულია თლილი ქვით.