ლელიანის წმ. თეოდორე ტირონის ეკლესია

ლელიანის წმ. თეოდორე ტირონის ეკლესია კახეთში, ლაგოდეხის მუნიციპალიტეტის სოფელ ლელიანში მდებარეობს. იგი ორ სამშენებლო ფენას მოიცავს - XI-XII და XVI-XVII საუკუნეებს. ნაგებობა სამეკლესიიან ბაზილიკას წარმოადგენს, აღმოსავლეთით სწორკუთხედში ჩაწერილი ნახევარწრიული აფსიდით. ჩრდილოეთის ნავიდან გადაკეთების შემდეგ მხოლოდ აღმოსავლეთით მდებარე სამსხვერპლოა დატოვებული, რომელსაც აღმოსავლეთით ნალისებური აბსიდი აქვს. ნალისებრი აფსიდი აქვს სამხრეთის ნავსაც. სამხრეთის ნავის სამხრეთ კედელი თაღებით ყოფილა გახსნილი, რომელიც მოგვიანებით ამოუშენებიათ. კამარები შეისრულია. ეკლესია თაღოვანი სარკმლებით ნათდება. ცენტრალური ნავი სამხრეთის და ჩრდილოეთის გასასვლელებით გვერდითა ნავებს უკავშირდება, ხოლო დასავლეთის კარით - გარშემოსავლელს. ტაძარი ნაგებია რიყის ქვით დუღაბზე. ეკლესიის ექსტერიერი სადაა. ფასადები აგურის კბილანისებრი წყობით ამოყვანილი ლავგარდნით სრულდება. ნაგებობას სამხრეთიდან ორსართულიანი სამრეკლო აქვს მიშენებული. პირველი სართული სამხრეთის ნავშია ჩაშენებული, მეორე სართული კი აგურით ამოყვანილი თაღოვანი ფანჩატურია.