მირზაანის "ალავერდის" ეკლესია

მირზაანის "ალავერდის" ეკლესია კახეთში, დედოფლისწყაროს მუნიციპალიტეტის სოფელ მირზაანში მდებარეობს. იგი XIV-XVIII საუკუნეებით თარიღდება. ნაგებობა სხვადასხვა პერიოდისა და ზომის ორი, ერთმანეთზე მიდგმული ნაწილისაგან შედგება. თავდაპირველად აქ დარბაზული ეკლესია მდგარა, რომელსაც მოგვიანებით დასავლეთიდან მოზრდილი დარბაზი მიაშენეს. ძველი ეკლესიის შემორჩენილი ნაწილი, საკურთხეველი და დარბაზის თითქმის ნახევარი, ახალი ნაგებობის საკურთხევლად გადააქციეს. გვიანი პერიოდისაა ეკლესიაზე დაშენებული სამრეკლოც. ტაძრის აფსიდი გეგმით ოდნავ ნალისებრი მოხაზულობისაა. აფსიდის ქვედა ნაწილი თავდაპირველია, ზედა ნაწილი კი გვიანდელია და ძველი ეკლესიის კედლების ზედა მონაკვეთთან ერთად დარბაზის მიშენების დროს არის აღდგენილი. ამავე პერიოდისაა საკურთხევლის ფართე შეისრული თაღიც. საკურთხეველი, დარბაზის იატაკთან მიმართებით, ოდნავ შემაღლებულია. დარბაზის გრძივი კედლებზე განიერი პილასტრებია, რომლებსაც შესისრული საბჯენი თაღი ეყრდნობა. დარბაზი გადახურულია შეისრული კამარით. ინტერიერი შელესილია. აფსიდში ერთი თაღოვანი სარკმელია გაჭრილი, ასეთივე თითო სარკმელია დანარჩენ კედლებშიც. ფასადები სადაა, მორთულია მხოლოდ აღმოსავლეთ და დასავლეთ ფასადები - კედლებზე წყობის შეწევით მიღებული, საფეხუროვან პოსტამენტზე მდგარი ჯვრებია გამოსახული. ჯვრებში მოჭიქული აგურია გამოყენებული. დასავლეთის სარკმელი ჯვრის ზედა მკლავშია მოქცეული. ფასადები ოთხსაფეხურიანი ლავგარდნით სრულდება. ეკლესიის ძველი ნაწილი საშუალო ზომის რიყის ქვითა და კირის დუღაბით არის ნაგები, გვიანი ნაწილი კი - რიყის ქვისა და კვადრატული აგურის შერეული წყობით. სამრეკლო რვაწახნაგაა. თითოეული წახნაგი შეისრულთაღიანი ღიობით არის გახსნილი. სამრეკლოს რვაწახნაგა, პირამიდული გადახურვა აქვს.