ნიკო ფიროსმანაშვილის სახელმწიფო მუზეუმი

ნიკო ფიროსმანაშვილის სახელმწიფო მუზეუმი კახეთში, დედოფლისწყაროს მუნიციპალიტეტის სოფელ მირზაანში მდებარეობს. ნიკო ფიროსმანაშვილი (ნიკო ფიროსმანი) XIX საუკუნის ქართველი პრიმიტივისტი მხატვარია. მის შემოქმედებას დღეს მთელს მსოფლიოში იცნობენ. ის ცნობილია ტრაგიკული და ბოჰემური ბიოგრაფიითაც. ფიროსმანი მედუქნეების შეკვეთით ხატავდა აბრებს, პორტრეტებს, სხვადასხვა კომპოზიციებს. მან სიცოცხლის ბოლომდე ვერ დააღწია თავი უკიდურესად გაჭირვებულ ყოფას. ფიროსმანი როგორც მხატვარი პირველად ძმებმა ზდანევიჩებმა აღმოაჩინეს და გააცნეს ევროპას მისი შემოქმედება. მხატვრის ნამუშევრებმა დიდი გავლენა მოახდინა პაბლო პიკასოზე, მან ფიროსმანის პორტრეტის გრავიურაც შექმნა. ფიროსმანის ბიოგრაფიაზე ბევრი დაზუსტებული ცნობა არ მოიპოვება, დაკარგულია მისი საფლავიც. ნიკო ფიროსმანის საზოგადოებისთვის გაცნობაში ასევე დიდი წვლილი შეიტანეს მხატვრებმა: დავით კაკაბაძემ, დიმიტრი შევარდნაძემ და ლადო გუდიაშვილმა. ნიკო ფიროსმანაშვილის მუზეუმი მის მამაპაპისეულ სახლშია განთავსებული. აქ ნახავთ ქიზიყური ყოფის ამსახველ ექსპონატებს, ფარდაგების კოლექციას და რაც მთავარია მხატვრის ორიგინალ ფერწერულ ტილოებს. აქ არის გამოფენილი აგრეთვე პიკასოს გრავიურა - “ფიროსმანის პორტრეტი”.