ნოქალაქევის ორმოცმოწამეთა ეკლესია

ნოქალაქევის ორმოცმოწამეთა ეკლესია სამეგრელოში, სენაკის მუნიციპალიტეტში მდებარეობს, ნოქალაქევის ქვედა ტერასის ცენტრალურ მონაკვეთზე. ძეგლი რამდენიმე ქრონოლოგიურ ფენას მოიცავს. ტაძარი აგებულია VI საუკუნეში, როგორც სამნავიანი ბაზილიკა, მოგვიანებით კი გუმბათოვან ნაგებობად გადაუკეთებიათ. XVI-XVII საუკუნეებში ეკლესია დადიანებმა აღადგინეს და მოახატვინეს. ტაძარს აღმოასვლეთით ნალისებრი მოხაზულობის შვერილი აფსიდი აქვს, რომელიც ექსტერიერში ხუთწახნაგაა. ნავები ერთმანეთისგან ოთხი წყვილი სვეტით გამოიყოფოდა. გუმბათი გრძივ მხარეზე კედლებს ეყრდნობა, ხოლო მოკლე მხარეებზე - განიერ საბჯენ თაღებს. გუმბათქვეშა კვადრატიდან წრეზე გადასვლა აფრებით ხორციელდება. გუმბათის ყელი ძალიან დაბალია და ოთხი სარკმელი აქვს. ცენტრალური დარბაზი დასავლეთის ნართექსს ერთი განიერი თაღით უკავშირდება. ეკლესიის სამხრეთი ნაწილის აღმოსავლეთით ცალკე სათავსია მოწყობილი. ეკლესიის სამხრეთის ნავი გადახურულია ცილინდრული კამარით. ჩრდილოეთის ნავის აღმოსავლეთი ნაწილი მთლიანად დაურღვევიათ და ვრცელი სამლოცველო შეუქმნიათ. ეკლესიას აქვს მეორე სართული, რომელიც სხვადასხვა დროს არის გადაკეთებული. ტაძარს ჩრდილოეთით კარიბჭე აქვს მიშენებული.