შალვა ამირანაშვილის სახელობის ხელოვნების სახელმწიფო მუზეუმი

შალვა ამირანაშვილის სახელობის ხელოვნების სახელმწიფო მუზეუმი ქალაქ თბილისში, ელექსანდრე პუშკინის ქუჩაზე მდებარეობს, პუშკინის სკვერთან. იგი საქართველოში ხელოვნების ნიმუშთა უდიდეს სახელმწიფო საცავ-მუზეუმს წარმოადგენს და საქართველოს ეროვნული მუზეუმის შემადგენლობაშია. მუზეუმში დაცულია ქართული ხელოვნების ნიმუშები უძველესი დროიდან დღემდე: ქართული ოქრომჭედლობა, ტიხრული მინანქრები, საიუველირო ნაწარმი და მხატვრული ქსოვილები. მუზეუმში ასევე წარმოდგენილია ახალი და თანამედროვე ქართული ფერწერისა და ქანდაკების ნიმუშთა მდიდარი კოლექცია. აქ ნახავთ ქართული კულტურის ისეთ უნიკალურ ნიმუშებს, როგორიცაა: ზარზმის ფერისცვალების ხატი, ბედიის ბარძიმი, ანჩისხატისა და ხახულის კარედები, თამარ მეფის ჯვარი, ლაკლაკიძეების ხატი და სხვა. მუზეუმს აქვს ყოფილი სსრ რესპუბლიკების, დასავლეთ ევროპის ქვეყნების და აღმოსავლეთის ქვეყნების ხელოვნების მნიშვნელოვანი კოლექციები. შენობა, რომელშიც მუზეუმია განთავსებული, 1835 წელს მდიდარმა ვაჭარმა იაკობ ზუბალაშვილმა ააგებინა შვეიცარიელ არქიტექტორს ბერნარდოცის. იგი კლასიცისტურ სტილშია გადაწყვეტილი. თავიდან აქ სასტუმრო იყო, 1950 წელს კი ხელოვნების მუზეუმმა დაიდო ბინა. შალვა ამირანაშვილის სახელობის ხელოვნების სახელმწიფო მუზეუმი მაღალმხატვრული, უნიკალური ექსპონატებით ერთ-ერთი საუკეთესო ადგილია ქართული ხელოვნებისა და უძველესი კულტურის გასაცნობად.