სოფ. ფონას წმ. სამების ეკლესია

სოფ. ფონას წმ. სამების ეკლესია კახეთში, ლაგოდეხის მუნიციპალიტეტის სოფელ ფონაში მდებარეობს. იგი XVII-XVIII საუკუნეებით თარიღდება. ეკლესია დარბაზულ ნაგებობას წარმოადგენს. შესასვლელი ორია - დასავლეთიდან და სამხრეთიდან. ორივე შესასვლელი სწორკუთხაა და ნახევარწრიულ თაღშია მოქცეული. დარბაზი აღმოსავლეთით ნახევარწრიული ჩაწერილი აფსიდით სრულდება. საკურთხეველი დარბაზისგან მხრებითა და შეისრული ფორმის სატრიუმფო თაღითაა გამოყოფილი. აფსიდის იატაკი ერთი საფეხურითაა შემაღლებული. აბსიდის ცენტრალურ ღერძზე თაღოვანი სარკმელია გაჭრილი. სარკმლის ორივე მხარეს თითო სწორკუთხა ნიშაა განლაგებული. საკურთხევლის ჩრდილოეთითა და სამხრეთით დამოუკიდებელი აფსიდალური პასტოფორიუმებია, რომლებსაც შესასვლელი დასავლეთიდანა აქვთ მოწყობილი. ორივე დამხმარე სათავსის აფსიდში ერთი სარკმელია გაჭრილი. ჩრდილოეთის პასტოფორიუმის სამხრეთ კედელში სწორკუთხა სამალავია მოწყობილი. დარბაზის გრძივი კედლები თითო მასიური აგურის ბოძითა და მათზე გადაყვანილი შეისრული ღრმა თაღებითაა დანაწევრებული. ყოველ თაღში თითო სარკმელია. დარბაზი გადახურულია შეისრული კამარით. ბოძებზე დამატებით პილასტრებია, რომლებზეც კამარის საბჯენი შეისრული თაღია გადაყვანილი. იატაკი აგურითაა მოგებული. ტაძარს დასავლეთიდან ეკვდერი და სამრეკლო აქვს მიშენებული. ეკვდერი მიდგმულია ჩრდილო-დასავლეთ კუთხეზე და შესასვლელი სამხრეთიდან აქვს. სამრეკლო ორსართულიანია. პირველი სართული სამი მხრით თაღებითაა გახსნილი და კარიბჭის ფუნქციასაც ითავსებს. მეორე სართული ექვსკუთხა ფანჩატურს წარმოადგენს. კომპლექსს ყორეკედელი ჰქონდა შემოვლებული, რომელიც მხოლოდ ფრაგმენტულადაა შემორჩენილი. ეკლესია ნაგებია ნატეხი და რიყის ქვითა და აგურით დუღაბზე.