ტაბაკინის მონასტერი

ტაბაკინის მონასტერი იმერეთის მხარეში, ზესტაფონის მუნიციპალიტეტის სოფელ ტაბაკინში მდებარეობს. იგი VII-VIII საუკუნეებით თარიღდება. მონასტერს ქვეყნის ისტორიაში მნიშვნელოვანი ადგილი უჭირავს. აქ შუასაუკუნეებში სამონასტრო ცხოვრება განვითარებული იყო და 70 ბერი მოღვაწეობდა. კომუნიზმის პერიოდში მონასტერში სიცოცხლე ჩაკვდა, თუმცა XX საუკუნის ბოლოს, 1992 წლიდან იგი კვლავ აღორძინდა. ტაბაკინის ტაძარი გამოირჩევა გამოირჩევა არქიტექტურითა და XVI საუკუნის მოხატულობით. ეკლესია ორნავიან ბაზილიკას წარმოადგენს კრიპტითა და მინაშენით, რომელსაც XI და XVI საუკუნეების აღდგენის კვალი ემჩნევა. ჩრდილოეთის ნავი მთავარ ნავს მასიურ ოთკუთხა ბოძზე დაყრდნობილი განიერი ორთაღედით უკავშირდება. ნავის აღმოსავლეთ ნაწილში აფსიდიანი სათავსია, ხოლო სამხრეთით მდებარე სტოა დამოუკიდებელ სათავსს წარმოადგენს. სტოის სამხრეთ ფასადი ორ მონუმენტურ მრგვალ სვეტზე გადასული თაღებითაა გაფორმებული, დასავლეთის კედელი კი ფართო თაღითაა გახსნილი. XVI საუკუნის 20-იან წლებში დანგრეული მონასტერი განაახლა და ტაძარი მოახატვინა ქუთათელმა ეპისკოპოსმა გერასიმე ჩხეტიძემ. ეკლესიაში შემონახულია ქტიტორის - იმერეთის მეფე ბაგრატ III-ის გამოსახულება.