თეკლათის ღვთისმშობლის შობის მონასტერი

თეკლათის ღვთისმშობლის შობის მონასტერი სამეგრელოში, ქალაქ სენაკთან ახლოს მდებარეობს. იგი XIX საუკუნით თარიღდება. აქ მოღვაწეობდა ბერი ალექსი შუშანია და მისი მონაზვნად აღკვეცილი დედა და დები. მონასტრის ფარგლებში ფუნქციონირებდა წმ. ნინოს სახელობის ქალთა სკოლა და სტამბა. მონასტერი თავისი ხარჯებით ბეჭდავდა სასულიერო ლიტერატურას და ხალხს ურიგებდა. 1904 წლიდან ტაძარში დასვენებულია ათონის მთიდან ჩამობრძანებული ყოვლადწმინდა ღვთისმშობლის ხატი, რომელიც “დაუჭკნობელი ყვავილის” სახელითაა ცნობილი. აქ ასევე დაცულია იოანე ნათლისმცემლის ცერა თითი, რომელიც ვერცხლის ლუსკუმაშია ჩასვენებული. ნაგებობა სამნავიან ბაზილიკას წარმოადგენს, შვერილი აფსიდით. ეკლესიას ჩრდილოეთით ორი ვიწრო სარკმელი აქვს, აღმოსავლეთით - ორი, სამხრეთით კი - სამი. ინტერიერი მთლიანად მოხატულია. ფასადებზე გვხვდება რელიეფური რომბები და მარტივი ფრიზები. დასავლეთიდან ტაძარს სამსართულიანი სამრეკლო აქვს მიშენებული, რომლის პირველი სართული კარიბჭის ფუნქციას ასრულებს. შესასვლელი სამია - დასავლეთიდან, სამხრეთიდან და ჩრდილოეთიდან. ეკლესია ნაგებია კარგად თლილი შერეული ქვით. ტაძარს სუფთად გათლილი ქვით ნაგები გალავანი აქვს შემოვლებული.