თოვლიანი უფსკრული

თოვლიანი უფსკრული აფხაზეთში, გუდაუთის მუნიციპალიტეტში მდებარეობს, ბზიფის ქედზე, ძინის უღელტეხილის მიდამოებში, ზღვის დონიდან 1975 მეტრზე (აფხაზეთის ტერიტორია ამჟამად ოკუპირებულია რუსეთის მიერ). იგი 4 შემაერთებელი მღვიმისაგან შედგება: თოვლიანი - მეჟენი - ილუზია - ბანკა. უფსკრული ჭებისა და შახტების ვრცელ სისტემას წარმოადგენს და მისი სიღრმე 1760 მეტრია. თოვლიან უფსკრულშია მსოფლიოში ყველაზე ღრმად შემორჩენილი ყინული, რაც მის უნიკალურობას განაპირობებს. მისი ასაკი დაახლოებით 5 ათასი წელია. თოვლიანი უფსკრული 1971 წლის 9 აგვისტოს აღმოაჩინეს. 1971-1972 წლებში იგი გამოკვლეული იყო 720 მ სიღრმემდე, ექსპედიციები პერიოდულად ტარდებოდა, საბოლოოდ კი, 2011 წელს, განხორციელდა ჩაშვება მოროზოვის ტბაში, რის შედეგადაც მღვიმის სიღრმემ 1760 მეტრი შეადგინა.