უზნარიანის ციხე

უზნარიანის ციხე - X საუკუნის ისტორიული ციხე მდებარეობს ბორჯომის მუნიციპალიტეტში, წაღვერთან, გუჯარულას ვიწრო, კლდოვან გასასვლელში მდინარის მარცხენა მაღალ ქარაფზე.

გუჯარეთის ხეობაში არსებულ ციხე-ნაგებობებიდან უზნარიანის ციხე გამორჩეულია. იგი აგებულია შუა საუკუნეებში და ხეობის სადარაჯოზე იდგა მრავალი ასწლეულის განმავლობაში.

ციხე კლდესთან არის შეზრდილი და გზიდან ერთ მთლიან მასივად წარმოგვიდგება. ის სამი მხრიდან თითქმის მიუვალია. მის მთავარ ნაწილს წარმოადგენს მძლავრი ზურგიანი კოშკი და მასზე მიჯრით მიშენებული გალავანი. შედარებით ადვილად მისადგომი მხარეები გალავნის მეორე რიგითაა გამაგრებული.

ციხის ტერიტორიაზე შემორჩენილია ნაგებობათა კვალი. იგი სტრატეგიულად მოხერხებულ ადგილზეა აგებული და ბუნებრივადაც საკმაოდ დაცულია. ციხის სახელწოდება მცენარის სახელთანაა დაკავშირებული.

ამ ციხეზე და მის მიმდებარე კლდეებზეა გადაღებული მხატვრული ფილმი „ცისკარა". ციხეზე ამოსვლა თუნდაც იმისთვის ღირს, რომ ხეობის თვალწარმტაცი ხედებით დატკბეთ.