ვეჯინის სასახლე

ვეჯინის სასახლე მდებარეობს სოფელ გლდანის დასავლეთით, ვეჯინის ხევში, გლდანი-თიანეთის გზიდან 1,5 კმ-ზე. თარიღდება X-XII საუკუნეებით.

სასახლე (9.1X26მ.) დგას რიყის ქვით ამოყვანილ სუბსტრუქციაზე, რომელიც სამხრეთიდან ოთხი კონტრფორსითაა გამაგრებული. ნაგებობას ორი შესასვლელი აქვს - აღმოსავლეთის თაღოვანია, დასავლეთის - სწორკუთხა. აღმოსავლეთისა და დასავლეთის კედლები თითქმის მთელ სიმაღლეზეა შემორჩენილი, ჩრდილოეთის -1მ-ზე, ხოლო სამხრეთის კედლისგან დასავლეთის ნაწილი კუთხიანად და ერთი პილასტრის ფრაგმენტი, რომელზეც ორნამენტული ჯვარია ამოკვეთილი. სასახლის სამხრეთ-აღმოსავლეთისა და სამხრეთ-დასავლეთის კუთხეებს მომრგვალებული კონტრფორსების ფორმა აქვს. შედარებით უკეთ დაცული აღმოსავლეთის და დასავლეთის ფასადები დასრულებულია ფრონტონით. პილასტრის დასავლეთ სიბრტყეზე ხელის მტევანია რელიეფურად გამოსახული.

სასახლიდან 20-30 მეტრში მდებარეობს XVII საუკუნის ღვთისმშობლის ეკლესია.