განძანის ეკლესია

განძანის ეკლესია სამცხე-ჯავახეთის მხარეში, ნინოწმინდის მუნიციპალიტეტის სოფელ განძანში მდებარეობს.

ძეგლი XIII-XIV საუკუნეებით თარიღდება. ეკლესია დარბაზულია, აღმოსავლეთით სწორკუთხედში ჩაწერილი ნახევარწრიული აფსიდით ბოლოვდება. ნაგებობა სამხრეთის მხარეს ორსაფეხურიან ცოკოლზე დგას. ეკლესია ნაგებია სხვადასხვა ფერის თლილი კვადრებით. შესასვლელი ორია - დასავლეთიდან და სამხრეთიდან. ორივე კარი გარედან არქიტრავულია, შიგნიდან კი - თაღოვანი. გარედან მარტივი ლილვების თაღოვანი მოჩარჩოება აქვს. ფასადები სადა ლავგარდნით სრულდება. ტაძარს ორი საამშენებლო წარწერა აქვს: სამხრეთის კარის თავზე და სამხრეთ ფასადზე. შესასვლელის თავზე მოთავსებული წარწერა ასე იკითხება: „ქ. ღვთივ გვირგვინოსანი მეფობაი გიორგისი, ღალქარნი და სამეფო დაიფარენ დედაო ყოველთა მხსნელისაო“. სამხრეთის ფასადზე ამოჭრილია შემდეგი ტექსტი: „ქრისტე ღმერთო, ადიდე ორთავე ცხორებათა მანდატურთუხუცესი შალვა ძითა და ძმითა. მათგან ცოცხალთა ვაშენეთ მეორე წმიდაი ესე საყდარი ჩუენ ნიკოლაძეთა. შალვას მონასა მანგლაფას მეოხ ექმენ ღმერთო ყოველთაო. საყდარი დედისა ღმრთისაი“.

სწორედ ამ ორი წარწერით ხერხდება ეკლესიების დათარიღება როგორც ზემოთა და ქვემოთა უბნისა. კერძოდ წარწერებში მოხსენეიებული მეფე გიორგი, გიორგი ბრწყინვალეა, ხოლო შალვა- ბექა ჯაყელის ძე. ზედა ეკლესიის აგების დროს კი შალვა მეჭურჭლეთუხუცესი ყოფილა, ხოლო ქვედა ეკლესიის აგების დროს მანდატუხუცესი. ჯაყელებს განძანიც ეკუთვნოდათ ჯავახეთში.