ილემის ეკლესია

ილემის ეკლესია იმერეთის მხარეში, ზესტაფონის მუნიციპალიტეტის სოფელ ქვედა ილემში მდებარეობს. იგი XI-XII საუკუნეებით თარიღდება. იგი სამნავიან ბაზილიკას წარმოადგენდა, თუმცა პირვანდელისახით არ არის შემორჩენილი. XIX საუკუნეში ეკლესიისათვის დასავლეთით ახალი ნაგებობა მიუშენებიათ გაფართოების მიზნით, ძველი ეკლესია კი საკურთხევლად უქცევიათ, იმავდროულად ტრაპეზი და სამკვეთლოც ახალი გაუმართავთ. ტაძრის ინტერიერი მოხატულია, ფრესკებს ახლავს ასომთავრული წარწერები, მოხატულობაში გვხვდება საერო პირთა გამოსახულებებიც. შესასვლელი სამია - დასავლეთით, სამხრეთითა და ჩრდილოეთით. გვიანდელ მინაშენს დასავლეთიდან ორსართულიანი, თაღებით გახსნილი სამრეკლო აკრავს, რომელიც კარიბჭის ფუნქციასაც ითავსებს. ტაძრის პირვანდელი ნაგებობის აღმოსავლეთის ფასადი დანაწევრებულია სიბრტყის შეწევით მიღებული სამი თაღით. ეკლესია ნაგებია თლილი მოთეთრო ფერის ქვით კირხსნარზე.