ჯონიას წმინდა გიორგის ეკლესია

ჯონიას წმინდა გიორგის ეკლესია იმერეთის მხარეში, ტყიბულის მუნიციპალიტეტის სოფელ ჯონიაში მდებარეობს. იგი XI-XII საუკუნეებით თარიღდება. ეკლესია დარბაზულ ნაგებობას წარმოადგენს, აღმოსავლეთით სწორკუთხედში ჩაწერილი ნახევარწრიული აფსიდით. ტაძარს დასავლეთით გვიანი პერიოდის მინაშენი აქვს, რომელიც ამჟამად ნახევრად დანგრეულია. ნაგებობას ორი შესასვლელი აქვს - სამხრეთითა და დასავლეთით, ორივე მათგანი გარედან სწორკუთხაა, შიგნიდან კი - თაღოვანი. დარბაზის კამარა ჩამონგრეულია, შემორჩენილია აფსიდის კონქი. კამარა პილასტრებზე გადაყვანილ თაღებს ეყრდნობოდა. საკურთხეველი გამოყოფილია გვიანი პერიოდის ხის კანკელით, რომელიც რუსული ტიპის მხატვრობითაა დაფარული. ინტერიერი შელესილია. ეკლესიას ვიწრო, თაღოვანი სარკმლები აქვს, რომლებიც ინტერიერში ფართოვდება. ფასადები სადაა, მოურთველი და თაროსებრი ლავგარდანი ასრულებს. ტაძრის კედელზე გვხვდება ასომთავრული ლაპიდარული წარწერა. ეკლესია ნაგებია თლილი ქვით.