მამიდას ქვა

მამიდას ქვა ქვემო ქართლის მხარეში, თეთრიწყაროს მუნიციპალიტეტში მდებარეობს, სოფელ გოხნარის მახლობლად, გოხნარის სერზე. მას ადგილობრივები „გულდამაანთ მამიდასაც“ უწოდებენ. მამიდას ქვა დიდი ლოდისგან გამოკვეთილ ქვაჯვარას წარმოადგენს და IV-VI საუკუნეებით თარიღდება. ჯვრის ცენტრში რელიეფური, კონცენტრული წრეებია გამოსახული. იგი ამჟამად მიწაზე დაწვენილ მდგომარეობაშია. მამიდას ქვასთან კიდევ ორი უფრო მომცრო ზომის ქვაჯვარაა აღმართული. ეს ქვაჯვარები ქვისავე ბაზისშია ჩასმული. ადგილობრივი მოსახლეობა ძირს დასვენებულ ქვის ჯვარს ზებუნებრივ ძალებს მიაწერდა და აქ საბჭოთა პერიოდშიც კი ტარდებოდა ამინდის გამოთხოვნის რიტუალი საგანგებოდ მოწვეული მღვდლის მონაწილეობით.