მეზირის ტბა

მეზირის ტბა - მდებარეობს მესტიის მუნიციპალიტეტში, ბეჩოსა და ეცერის თემების საზღვარზე, ტვებიშის თავზე, მეზირის მთაზე, შემაღლებულ ფერდობზე, ზღვის დონიდან 2280 მეტრზე. მეზირის მთავარანგლოზის ეკლესიიდან 15-20 მეტრში.

გადმოცემით ეკლესიის გვერდით ძველად საბერიო სენაკებიც ყოფილა, სადაც რამდენიმე ბერი ცხოვრობდა. ბერები მეტად შეუწუხებია უწყლობას. წყაროებით და პატარა მდინარეებით მდიდარ სვანეთში, სწორედ მეზირის მთა ყოფილა გამონაკლისი მახლობლად სასმელი წყალი არსად მოიპოვებოდა ერთხელაც ღმერთს შეუსმენია ბერების ლოცვა და დილისთვის ეკლესიის მახლობლად ტბა გაუჩენია. მოსახლეობა ერიდებოდა ამ ტბის დაბინძირებას, ვინაიდან მათი აზრით ტბის წაბილწვა ღვთის რისხვას გამოიწვევს რისი გამოხატულება - აუცილებელი გაავდარებაა. ამ ტბებთან იკრძალება ჩხუბი, აყალმაყალი, წყალში შესვლა, ტბაში რაიმე ნივთის თუნდაც ქვის ჩაგდება და სხვა.

ტბა მეზირიდან პანორამული ხედები იშლება მწვერვალ უშბაზე და მთლიან კავკასიონზე. ტბაში არეკლილი მწვერვალები დაუვიწყარ შთაბეჭდილებას ტოვებს მნახველში.

ტვებიშიდან ტბამდე საფეხმავლო გზის სიგრძე 4 კმ-ია.