მინიატურების პარკი

მინიატურების პარკი გურიაში, ოზურგეთის მუნიციპალიტეტში, შეკვეთილში მდებარეობს. პარკში საქართველოს 44 არქიტექტურული ძეგლის მინიატურაა წარმოდგენილი. იგი საქველმოქმედო ფონდ „ქართუს“ დაფინანსებით შეიქმნა და სახელმწიფოს საჩუქრად გადაეცა. პარკი კეთილმოწყობილია, სიმწვანე, ბაღები და ბილიკები ძალიან სასიამოვნო და კომფორტულ გარემოს ქმნის დამთვალიერებლებისთვის. აქ ერთ სივრცეში გაეცნობით საქართველოს სხვადასხვა კუთხეებში მდებარე კულტურულ ძეგლებს. მინიატურების ქალაქში ნახავთ მცხეთის ჯვარს, სვეტიცხოველს, სვანურ კოშკებს, ალავერდს, ძველ თბილისს, ბაგრატს, ნიკორწმინდას და სხვა მრავალი მნიშვნელოვანი ძეგლის მინიატურულ მოდელს. თითოეული მოდელის შექმნისას გათვალისწინებულია გარემო და ლანდშაფტი, სადაც კონკრეტული ძეგლი მდებარეობს. ეს პარკი, გარდა იმისა, რომ საინტერესო სანახაობას წარმოადგენს, ხელს უწყობს ფართო საზოგადოებისთვის საქართველოს კულტურული მემკვიდრეობის გაცნობას და ზრდის ინტერესს ჩვენი ქვეყნის უძველესი ხუროთმოძღვრებისადმი. მინიატურების პარკი გურიის ერთ-ერთი პოპულარული ღირსშესანიშნაობაა და უამრავ ადგილობრივსა თუ ტურისტს იზიდავს.

პარკში ვიზიტის ღირებულებაა 3 ლარი. 6 წლამდე პატარებისთვის ვიზიტი უფასოა.