მზიური

ბავშვთა ქალაქი მზიური თბილისში, ჭავჭავაძის გამზირზე მდებარეობს. იგი თბილისის ერთ-ერთი პოპულარული და დადებითი განწყობით სავსე ადგილია. მზიურში მოწყობილია სასეირნო ბილიკები, საგანმანათლებლო ცენტრი, სპორტული კომპლექსი და გასართობები ბავშვებისთვის. შესასვლელში ნოდარ დუმბაძის პერსონაჟების ქანდაკებები დგას. პარკის ცენტრალურ ნაწილში ამფითეატრია, სადაც წარმოდგენები, კინოჩვენებები, კონცერტები და სხვადასხვა სახის ღონისძიებები იმართება. ბაღში ფუნქციონირებს კაფე მზიური, სადაც სასიამოვნო და ხალისიანი გარემო დაგხვდებათ. ეს სოციალური კაფეა, რომლის მოგება მზიურის განვითარებასა და მის შინაარსობრივად გამდიდრებას ხმარდება. დაბურული ტყე-პარკი და მრავალფეროვნება შესანიშნავ გარემოს ქმნის, როგორც ბავშვებისთვის, ასევე ზრდასრულებისთვის. ეს ბაღი ერთგვარად სიკეთისა და ზღაპრული სამყაროს სიმბოლოდაც კი იქცა და ქალაქის ერთ-ერთი განსაკუთრებული ადგილია. მზიურის დაარსების იდეა ქართველ მწერალს - ნოდარ დუმბაძეს ეკუთვნის. 1975 წელს გაზეთში - “ლიტერატურული საქართველო” იგი წერდა: “წამხედურობად ნუ ჩამომართმევთ და ხომ არ აჯობებდა, მდინარე ვერეს ხეობაში, იქიდან დაწყებული, სადაც ახლა ზოოპარკია, ვიდრე ვაკე-საბურთალოს გადასასვლელამდე, ჩვენებური, ქართული „დისნეილენდი“ აგვეშენებინა”? პარკის პროექტზე არქიტექტორთა მთელი ჯგუფი მუშაობდა. იგი 1982 წელს გაიხსნა. 2015 წლის 13 ივნისს მდინარე ვერეს ხეობაში მომხდარი წყალდიდობის შედეგად პარკი მნიშვნელოვნად დაზიანდა, თუმცა დღესდღობით განახლებულია და უფრო და უფრო აქტიური და სიცოცხლით სავსე ხდება. მზიური ერთ-ერთი საუკეთესო ადგილია განტვირთვისთვის, დასვენებისთვის, ოჯახთან ერთად დღის ხალისიანად გასატარებლად.