ობუჯის მთავარანგელოზთა ეკლესია

ობუჯის მთავარანგელოზთა ეკლესია სამეგრელოში, წალენჯიხის მუნიციპალიტეტის სოფელ ობუჯში მდებარეობს. ტაძარი აგებულია უახლოეს წლებში. იგი თავისუფალი ჯვრის ტიპის გუმბათოვან ნაგებობას წარმოადგენს, აღმოსავლეთით შვერილი აფსიდით. აფსიდი ინტერიერში ნახევარწრიულია, ექსტერიერში კი სამწახნაგა. დასავლეთიდან ეკლესიას კარიბჭე აქვს მიშენებული, რომელიც დასავლეთიდან დიდი თაღითაა გახსნილი. გუმბათი რვაწახნაგაა, ყველა წახნაგში თითო თაღოვანი სარკმელია გაჭრილი. თითო სარკმელია ჯვრის დასავლეთის, სამხრეთისა და ჩრდილოეთის მკლავებშიც, აღმოსავლეთის აფსიდში კი - სამი. ფასადებს ლილვისა და წრეთარგისგან შექმნილი ლავგარდანი ასრულებს. ეკლესიის სამხრეთ დასავლეთით ორსართულიანი სამრეკლო დგას, რომლის პირველი სართული ეზოში შესასვლელი კარიბჭის ფუნქციას ითავსებს. სამრეკლოს მეორე სართული თაღედით გახსნილი რვაწახნაგა ფანჩატურია.