საქართველოს საპატრიარქო

საქართველოს საპატრიარქო ქალაქ თბილისში, ერეკლე მეორის მოედნის აღმოსავლეთ ნაწილში მდებარეობს. იგი განთავსებულია ყოფილ ეგზარქოსის რეზიდენციაში. ამ ადგილას მეფე როსტომის სასახლე იდგა. დღევანდელი ნაგებობის მშენებლობა 1809 წელს დაიწყო სასახლის ნანგრევებზე, მეფის რუსეთის წარმომადგენლის, საქართველოს მთავარმმართებლისთვის. მომდევნო პერიოდში აქ მართლმადიდებლური რუსული საეკლესიის მმართველობა - ეგზარქოსი და მისი სამსახურები განთავსდა. ნაგებობას არაერთხელ ჩაუტარდა საფუძვლლიანი რეკონსტრუქცია, თუმცა ფასადებზე ჯერ კიდევ შეიმჩნევა კლასიცისტური მოტივები. XX საუკუნის 80-იან წლებამდე აქ სამოქალაქო მილიციის სამმართველო იყო, შემდეგ საქართველოს ხელოვნების ინსტიტუტი. 1990 წელს კი კომპლექსი კათალიკოს-პატრიარქს გადაეცა რეზიდენციისა და საეკლესიო სამსახურების განსათავსებლად. საქართველოს საპატრიარქო დაწესებულებათა ერთობლიობაა საქართველოს მართლმადიდებელი ეკლესიის ფარგლებში, რომლებიც თავისი განყოფილებებითა და სამსახურებით ეხმარებიან სრულიად საქართველოს კათოლიკოს-პატრიარქს აღმასრულებელი ხელისუფლების განხორციელებაში. იგი კოორდინაციას უწევს ეპარქიებში მოქმედ მსგავს დაწესებულებებს. საპატრიარქოს აქვს თავისი გამომცემლობა, რადიო და ტელემაუწყებლობა.