სხვავის ჭა-საყინულე

სხვავის ჭა-საყინულე რაჭაში, ამბროლაურის მუნიციპალიტეტში, სოფელ შუა სხვავასთან ახლოს მდებარეობს, სოფლიდან დაახლოებით 4 კმ-ის დაშორებით, ზღვის დონიდან 1310 მეტრზე. ჭა დიდი ძაბრით იწყება, მისი ფსკერი კი თოვლითაა ამოვსებული. ძაბრი ციცაბოდ დახრილ გვირაბში გადადის. ქვაბულში გვხვდება ყინულის სტალაქტიტები, სტალაგმიტები, საუკუნოვანი ყინულის სვეტები და კასკადები, რაც ძალიან ლამაზ სანახაობას წარმოადგენს. სხვავის საყინულე ორ მონაკვეთს მოიცავს, პირველ ძაბრში ჩასვლა მარტივია, მეორე მონაკვეთის დასაძლევად კი თოკი ან ყინულში საფეხურების გაჭრაა საჭირო. საყინულეში ჰაერის ტემპერატურა მთელი წლის განმავლობაში 0°C-ზე დაბალია. სხვავის ჭა-საყინულე რაჭის ერთ-ერთი საინტერესო და შთამბეჭდავი ადგილია.