სქურის ეკლესია

სქურის ეკლესია სამეგრელოში, წალენჯიხის მუნიციპალიტეტში, სქურის ჩრდილოეთით მდებარეობს. იგი XIII საუკუნით თარიღდება. ტაძარს ეტყობა გადაკეთებისა და აღდგენების კვალი. ძეგლმა ჩვენამდე ძალიან დაზიანებული სახით მოაღწია, 2018 წელს კი აღადგინეს. ეკლესია დარბაზულ ნაგებობას წარმოადგენს, აღმოსავლეთით სწორკუთხედში ჩაწერილი ნახევარწრიული აფსიდითა და მინაშენებით. ინტერიერი კარგად ნათდება, ყველა კედელში სამი სარკმელია გაჭრილი. სარკმლებს ლილვოვანი მოჩარჩოება აქვს. შესასვლელი სამია - დასავლეთით, სამხრეთითა და ჩრდილოეთით. დასავლეთის შესასვლელს მოჩუქურთმებული თაღოვანი ჩარჩო აქვს, თავად შესასვლელი კი სწორკუთხაა. ნაგებობა გამოირჩევა მაღალი პროპორციებით. ტაძარი მოპირკეთებულია სუფთად თლილი კვადრებით.