თაბორის "დედაღვთისა"

თაბორის "დედაღვთისა" ლეჩხუმში, სოფელ თაბორის განაპირას მდებარეობს. იგი როგორც ჩანს, საგვარეულო საძვალე სამლოცველო კოშკი უნდა ყოფილიყო. ნაგებობის ჩრდილოეთით მოსწორებული ბაქანია, სადაც სავარაუდოდ თავდაპირველი ეკლესია იდგა. ძველი ტაძრის მოჩუქურთმებული დეკორატიული ფრაგმენტები დატანებულია ამჟამინდელი სამლოცველოს კედლებში. ძეგლი ნაგებია თლილი შირიმის კვადრებით. 1969 წელს ეკლესიაში ჯერ კიდევ ინახებოდა შენაწირი XVIII-XIX საუკუნეების ვერცხლის სასმისები მხედრული წარწერებით: “ქრისტე, ჯვარცმის თაბორის შეწირული უხმარი ვერცხლი მე გავაჭედინე ლაშხიშვილმა ბახუტამ და ისევე მოგვირთმევია ჩვენის სადღეგრძელოდ. სულის საოხად და საცხონებლად, ამინ”, “მღუდელი დავით ნიკოლოზის ძე ქასელაძე”.