ტყიბულის წყალსაცავი

ტყიბულის წყალსაცავი იმერეთის მხარეში, ტყიბულის მუნიციპალიტეტში მდებარეობს. იგი ტყეებითაა გარშემორტყმული და ლამაზი ხედებით გამოირჩევა. მისი ფართობი 12,1 კმ²-ა, მაქსიმალური სიღრმე კი - 12,5 მ. წყალსაცავის ტერიტორია შესანიშნავია საპიკნიკედ, აქ საკემპინგე ადგილებსაც მარტივად იპოვნით. ტყიბულის წყალსაცავი მდიდარია თევზით, ამიტომაც ის თევზაობის მოყვარულებსაც იზიდავს. წყალსაცავი საზრდოობს მდინარე ტყიბულისა და სხვა შენაკადების წყლით, ასევე ატმოსფერული ნალექებით. იგი შექმნილია მიწაყრილის კაშხლით, რომლითაც დაგუბებულია მდინარე ტყიბულა იქ, სადაც ის ქვაბულის ფსკერზე კარსტულ შახტში იკარგებოდა.