ახალსოფლის ღვთისმშობლის ეკლესია

ახალსოფლის ღვთისმშობლის ეკლესია ქვემო ქართლის მხარეში, თეთრიწყაროს მუნიციპალიტეტის სოფელ ახალსოფელში მდებარეობს. იგი IX-X საუკუნეებით თარიღდება. ეკლესია დარბაზულია და აღმოსავლეთით სწორკუთხედში ჩაწერილი ღრმა აფსიდით სრულდება. ნაგებობის კედლები სადაა, დაუნაწევრებელი. დარბაზი გადახურულია ცილინდრული კამარით, რომელც მძლავრ თაღებს ეყრდნობა. კედლებს შიგნიდან ქვის ხარისხი მიუყვება. ეკლესიას სამი თაღოვანი სარკმელი აქვს - აღმოსავლეთით, დასავლეთითა და სამხრეთით. შესასვლელი ერთია - სამხრეთიდან, რომელიც გარედან არქიტრავულია, შიგნიდან კი - თაღოვანი. იგი მოგვიანებით გადაუკეთებიათ და თაღს ოდნავ შეისრული ფორმა აქვს. სარკმლები, გარდა სამხრეთისა, შემკულია გიდეებგადაკეცილი სათაურებით. აღმოსავლეთი სარკმლის სათაური დეკორირებულია რომბისებრი გეომეტრიული მოტივით, სათაურის ზემოთ კი რელიეფია, რომელზეც გამოსახულია დანიელი ლომების ხაროში. დასავლეთ სარკმლის სათაური ორმაგია და მის შუაში გოლგოთის ჯვრის რელიეფია. ეკლესია ნაგებია ბაზალტის უხეშად თლილი კვადრებით.