ახალსოფლის წმინდა გიორგის ეკლესია

ახალსოფლის წმინდა გიორგის ეკლესია ქვემო ქართლის მხარეში, თეთრიწყაროს მუნიციპალიტეტის სოფელ ახალსოფელში მდებარეობს. იგი X-XI საუკუნეების ძეგლია. ნაგებობა დარბაზულია, აღმოსავლეთით ნახევარწრიული აფსიდით. ეკლესიის დასავლეთ მხარეს ჩანს მინაშენის ცოკოლი. ტაძრის შიდა სივრცე ცილინდრული კამარითაა გადახურული, რომელიც მძლავრ საბჯენ თაღებს ეყრდნობა. დასავლეთ კედლის თაღი კრონშტეინებს ებჯინება. ეკლესიას ოთხი თაღოვანი სარკმელი აქვს, რომელთაგან ორი სამხრეთის კედელშია, თითო-თითო კი - აღმოსავლეთითა და დასავლეთით. აღმოსავლეთის სარკმლებს მოჩუქურთმებული სათაურები აქვთ. ინტერიერი შელესილია. ნაგებობას ერთი შესასველი აქვს - სამხრეთიდან. კარის თაღში რელიეფური წმინდანის ფიგურაა გამოსახული. ტაძრის მორთულობაში ადამიანთა ფიგურების გამოსახულებასთან ერთად გვხვდება ცხოველთა, ფრინველთა, მცენარეული და გეომეტრიული გამოსახულებები. ეკლესიას ეტყობა XIX საუკუნის შეკეთების კვალი.