ანაკლია

კურორტი ანაკლია სამეგრელოში, ზუგდიდის მუნიციპალიტეტში მდებარეობს, შავი ზღვის პირას, ზღვის დონიდან 3 მეტრზე. იგი კლიმატური კურორტია ზღვისპირა ნოტიო ჰავით. მზიანი სანაპიროების, ზღვის, რუჯის და მრავალფეროვნების მოყვარულთათვის ანაკლია ერთ-ერთი მიმზიდველი ადგილია. იგი დიდი პოპულარობით სარგებლობს და ყოველწლიურად უამრავი ტურისტი თუ ადგილობრივი სტუმრობს. ანაკლიაში ფუნქციონირებს მაღალი კლასის სასტუმროები, აკვაპარკი, ბარები და სხვა საზოგადოებრივი დაწესებულებები. ანაკლიაში 2015 წლიდან ყოველ წელს იმართება ელექტრონული მუსიკის ფესტივალი - GEM Fest, რაც კიდევ უფრო ზრდის კურორტის პოპულარობას. თუკი ისტორია და კულტურა გაინტერესებთ, შეგიძლიათ მოინახულოთ ანაკლიის ციხე, რომელიც 1703 წელს არის აგებული. ანაკლიას დიდი ხნის ისტორია აქვს, იგი პონტოს სამეფოს ქალაქ ჰერაკლეას ერთ-ერთი კოლონია იყო. მას მნიშვნელობა არც შუა საუკუნეებში დაუკარგავს, გვიან შუა საუკუნეებში ანაკლია ოდიშის სამთავროს მნიშვნელოვანი ნავსადგური იყო და ტრაპიზონთან და კონსტანტინოპოლთან აწარმოებდა ვაჭრობას. დღესდღეობით ის საქართველოს ერთ-ერთი კეთილმოწყობილი კურორტია. განვითარებული ინფრასტრუქტურა, ფერადოვნება, ქვიშიანი სანაპირო, მზე და ლივლივა ზღვა შესანიშნავ გარემოს ქმნის კომფორტული და ბედნიერი დასვენებისთვის.