ატენის კოშკი

ატენის კოშკი დგას დიდ ატენსა და ფუხაანთ უბანს შორის, შიდა ქართლში, გორის მუნიციპალიტეტში, მდ. ტანას მარცხენა ნაპირას, კლდეზე. კოშკი გეგმით უსწორო ოთხკუთხედია (7,2X4,8 მ), ნაგებია ნატეხი ქვით. კარის წირთხლზე გამოყენებულია თლილი ქვა. კოშკი დაზიანებულია: ჩაქცეულია სართულშუა ხის გადახურვები. შემორჩენილია სამი სართული. შესასვლელი პირველ სართულზეა. კოშკთან მისასვლელად კლდეში ამოკვეთილია საფეხურები. პირველი სართულის დას. და სამხრეთ კედლებში ორ-ორი სათოფურია, აღმოსავლეთისაში - ერთი. მეორე სართულის სამი კედელი ყრუა. მეოთხე, აღმოსავლეთის კედელში, ორი სათოფურია. მესამე სართულის გრძივ კედლებში ორ-ორი სათოფურია, განივში თითო.