ბერების კლდე

ბერების კლდე იმერეთის მხარეში, ხარაგაულის მუნიციპალიტეტის სოფელ ნუნისში მდებარეობს, ბორჯომ-ხარაგაულის ეროვნული პარკის ტერიტორიაზე. იგი განვითარებული შუასაუკუნეების კლდეში ნაკვეთ გამოქვაბულების კომპლექსს წარმოადგენს. გამოქვაბულები შიშველი ფლატის ზედა ნაწილშია გამოკვეთილი ორ იარუსად. სათავსები ერთმანეთთან გასასვლელით და კლდეში ნაკვეთი საფეხურებითაა დაკავშირებული, მათ წინ კი ვიწრო ბილიკია დატოვებული. ერთ-ერთ ქვაბულს არაზუსტი მოყვანილობის კამარა აქვს. აქვე გვხვდება წყლის რეზერვუარი, სადაც წყალი დღესაც გროვდება. სათავსის კედლებზე საჭრაქეები და თაღოვანი ნიშაა გამოკვეთილი. გამოქვაბულების ძირში სანახევროდ მიწაში შეჭრილი, დაუმუშავებელი ქვითა და კირხსნარით ნაგები, კამაროვანი სათავსია, რომელსაც დასავლეთიდან სწორკუთხა შესასვლელი აქვს. ბერების კლდიდან რამდენიმე კილომეტრის დაშორებით ნუნისის IX-X საუკუნეების ეკლესია მდებარეობს, რომელიც, ლეგენდის თანახმად, გამოქვაბულებს საიდუმლო გვირაბით უკავშირდებოდა.