ბინაძორის ეკლესია

ბინაძორის ეკლესია მდებარეობს ქვემო ქართლის მხარეში, მარნეულის მუნიციპალიტეტის, დაბა შაუმიანის (შულავერი) ტერიტორიაზე ტყეში.

ბინაძორის ეკლესია აგებული უნდა იყოს XII-XIII საუკუნეში. ის მდებარეობს შაუმიანის განაპირას, ძველ სასაფლაოზე, ხევის მარჯვენა მხარეს, სადაც ადგილობრივებს მაგიდები აქვთ გამართული დღესასწაულებისთვის. ბილიკი აღნიშნული მაგიდებიდან მიდის ეკლესიისკენ. რუკაზე ცდომილება შეიძლება იყოს (200-300) მეტრი.

ბინაძორის ძველი სავარაუდო სახელი უხეში თარგმანით შეიძლება იყოს თეთრსოფელი/თეთრისოფელი ან თეთრიხევი/თეთრახევი. (გ.ხ.)

დარბაზული ტიპის ნაგებობა გეგმაში სწორკუთხედში ჩაწერილი, აღმოსავლეთით აფსიდით განსრულებული მოზრდილი ზომის ეკლესიაა, რომლის პერანგიც სუფთად ნათალი ქვითაა ნაწყობი. ტაძარს ორი შესასვლელი - სამხრეთით შედარებით დიდი, ხოლო ჩრდილოეთით მცირე, გაჭრილი კარის ღიობები აქვს. აღმოსავლეთ სარკმლის ფართო ღიობს გარედან მოჩუქურთმებული საპირე და გრეხილი ლილვები ევლება. საკურთხევლის აფსიდში, სარკმლის ჩამოსწვრივ სამღვდელმთავრო დასადგომი ნიშაა გამოკვეთილი. ეკლესიის აფსიდში, სარკმლის წირთხლებში და ჩრდილოეთ მინაშენის აფსიდში ნალესობაა შერჩენილი, სადაც მოხატულობის ფრაგმენტები იხილვება. ეკლესიას სამხრეთ და ჩრდილოეთით მინაშენები აქვს მიდგმული. სამხრეთ მინაშენის შესასვლელი ღიობის ფრაგმენტებზე ჩუქურთმიანი ქვებია დარჩენილი. ეკლესიის აღმოსავლეთით გეგმის დონეზე სხვადასხვა ნაგებობის კვალი იკითხება.