ბუჩუკუნის ციხე

ბუჩუკუნის ციხე მდებარეობს ქვემო ქართლის მხარეში, ბოლნისის მუნიციპალიტეტში, სოფელ ინჯაოღლის მიმდებარედ.

ციხე ბოლნისისა და დმანისის ხევების საზღვარზე, რკინის ქედის (დემირდაღის) თხემზეა აშენებული, მდ. ფოლადაურის მარჯვენა შენაკადის - რკინისწყლის (დემირსუს) სათავეში. ციხეს კონუსური კლდის თხემი უკავია, იქ მისასვლელად კლდეში ბილიკია გაჭრილი. ციხე ნატეხი ქვითაა ნაგები დუღაბზე. განირჩევა ორი სამშენებლო ფენა: ადრეული შუა საუკუნეების და გვიანი შუა საუკუნეების. ციხე ორი ნაწილისგან შედგება, უფრო მოზრდილია კოშკისებრი ნაგებობა, რომელიც ოთხასრთულიანი ყოფილა. კედლებში სამ სართულად გაყოლებულია სამზერ-სათოფურები და სართულშუა გადახურვის საკოჭეები. მეორე ნაწილი უჭირავს მცირე ეზოს, რომელიც კედლითაა გადაკეტილი. კლდის ქვევით ადრეშუა საუკუნეების ოთხკუთხა კოშკია შემორჩენილი, რომელიც რეგულარული წყობის საშუალო ზომის ქვებითაა ნაგები. ვახუშტი ციხის შესახებ არაფერს ამბობს, თუმცა რუკაზე ის აღნიშნული აქვს ბუჩუკუნის სახელით. გიულდენშტედტის მოგზაურობისას ეს ადგილები უდაბური ყოფილა და ერეკლე მეფეს რკინის საბადოს წარმოების დასაცავად ციხე ხელახლა განუახლებია (დ. ბერძენიშვილი. ნარკვევები ქვემო ქართლის ისტორიული გეოგრაფიიდან. თბ., 2014, გვ.134).

ციხე მდებარეობს რთულად მისადგომ ადგილზე.

ბუჩუკუნის ციხე შეიძლება ასევე იწოდებოდეს როგორც ქოროღლის ან/და ინჯაოღლის ციხე