ჩხარის მაცხოვრის აღდგომის ეკლესია

ჩხარის მაცხოვრის აღდგომის ეკლესია იმერეთის მხარეში, თერჯოლის მუნიციპალიტეტის სოფელ ჩხარში მდებარეობს. იგი შუასაუკუნეების ტაძარია, რომელსაც მრავალგზის აღდგენის კვალი ეტყობა. ეკლესია დარბაზულ ნაგებობას წარმოადგენს, შვერილი აფსიდით. ტაძარი ერთსაფეხურიან ცოკოლზე დგას. აფსიდში სამი სარკმელია გაჭრილი, რომელთაგან ცენტრალური ამჭამად ამოქოლილია. სარკმლებს სხვადასხვა გვარი ორნამენტით შემკული მოჩარჩოება აქვთ. კიდევ ერთი სარკმელი სამხრეთ კედელშია და ერთი კი - დასავლეთისაში. ეკლესიის ნახევარცილინდრული გადახურვა პილასტრებზე გადაყვანილ თაღებს ეყრდნობოდა. გადახურვა დღესდღეობით ჩამონგრეულია. დარბაზს სამი შესასვლელი ჰქონდა - დასავლეთით, სამხრეთითა და ჩრდილოეთით, ჩრდილოეთისა ამოქოლილია. შესასვლელები გარედან არქიტრავულია, შიგნიდან კი - თაღოვანი. ტაძრის ინტერიერი შელესილი და მოხატული ყოფილა, თუმცა მოხატულობის ძალიან მცირე ფრაგმენტებია შემორჩენილი. ეკლესია ნაგებია კარგად თლილი ყვითელი და რუხი ფერის ქვიშაქვის კვადრებით.