ჩუკულის მთავარანგელოზთა ეკლესია

ჩუკულის მთავარანგელოზის ეკლესია სვანეთში, ლენტეხის მუნიციპალიტეტის სოფელ ჩუკულში მდებარეობს. იგი X-XI საუკუნეებით თარიღდება. ეკლესია დარბაზულ ნაგებობას წარმოადგენს, აღმოსავლეთით ნახევარწრიული, ექსტერიერში შვიდწახნაგა, შვერილი აფსიდით. ტაძარს მიდგმული აქვს გვიან აშენებული კარიბჭე. აფსიდი დარბაზისგან ქვის კანკელითაა გამოყოფილი. დარბაზის კამარა პილასტრებზე გადაყვანილ საბჯენ თაღს ეყრდნობა. პილასტრებიდან გრძივ კედლებზე თაღედები გადადის. დარბაზში ქვის ორნამენტული კვარცხლბეკი დგას, რომელზეც ხის ჯვარია აღმართული. კვარცხლბეკზე ხელის ორი მტევანია გამოსახული. ინტერიერი მოხატულია გვიან შუა საუკუნეებში, შეიმჩნევა ადრეული ფენაც. მოხატულობის რეპერტუარი მრავალფეროვანია. საკურთხეველში სამი სარკმელია, რომლებიც ექსტერიერში აფსიდის ლუწ წახნაგებზე გამოდის. შესასვლელი ორია - დასავლეთიდან და სამხრეთიდან. ეკლესია ნაგების შირიმის სუფთად თლილი კვადრებით.