ალვანის სამების ეკლესია

ალვანის სამების ეკლესია მდებარეობს კახეთის მხარეში, ახმეტის მუნიციპალიტეტის, სოფელ ზემო ალვანის სასაფლაოს ტერიტორიაზე.

ეკლესია აგებულია მეთექვსმეტე საუკუნეში.

ეკლესია ჯვარ-გუმბათოვანია (13.8x13მ); მისი ქვედა ნაწილი აგურითა და უსწორმასწორო ფორმის ქვის ფილებითაა ნაშენი. საბჯენი თაღები, კამარები, გარეთა კუთხეები, შესასვლელები, სარკმლები, დეკორატ. ჯვრები ფასადებზე და გუმბათის ყელი -აგურისაა. შესასვლელი დას-ით და სამხრ.-ით აქვს. ორივე კარი სწორკუთხაა. ჯვრის მკლავების გადაკვეთაზე გუმბათია აღმართული, რომელიც ისრული ფორმის აფრების მეშვეობით ოთხ ისრულ თაღს ეყრდნობა. აფსიდში აგურის ტრაპეზი დგას. საკურთხევლის იატაკი ორი საფეხურით შემაღლებულია. საკურთხევლის გვერდებზე სამკვეთლო და სადიაკვნეა. გუმბათის ყელი სიმაღლეში ლილვით გამიჯნულ ორ არათანაბარ ნაწილადაა გაყოფილი. ქვედა, უფრო მაღალი ნაწილი რვაწახნაგაა, ხოლო ზედა ცილინდრული. წახნაგოვანი ნაწილის წიბოებს, მთელ სიმაღლეზე, ლეკალური აგურით ნაწყობი განიერი ლილვი აუყვება. ყელი დასრულებულია აგურით ნაწყობი მარტივი პროფილის დაბალი ლავგარდნით. ეკლესიის დას. ფრონტონზე დაშენებულია გეგმით კვადრ, ოთხივე მხარეს ვიწრო თაღებით გახსნილი და თუნუქის პირამიდული სახურავით გადახურული პატარა სამრეკლო. ეკლესია გადახურულია ღარიანი კრამიტით.