არჯევან-სარვანის ღვთისმშობლის ეკლესია

არჯევან-სარვანის ეკლესია მდებარეობს თრიალეთში, დღევანდელ წალკის მუნიციპალიტეტში, ქვემო ქართლში.

ეკლესია მდებარეობს სოფლის ჩრდილო-დასავლეთ ნაწილიში. იგი წარმოადგენს დარბაზულ ნაგებობას. აშენებულია დიდი ზომის დამუშავებული კვადრებით. გადახურულია ლორფინით. ეკლესია გეგმაში მართკუთხაა, აღმოსავლეთით ნახევარწრიული აფსიდით, რომელშიც ორი თაღოვანი ნიშია. საკურთხევლის იატაკი აწეულია ერთი საფეხურით. შესასვლელი სამხრეთიდან აქვს. იგი არქიტრავულია. არქიტრავზე ამოკვეთილია კვარცხლბეკზე აღმართული ჯვარი, რომელსაც შემოუყვება ბოლოებში ჰორიზონტალურად გაშლილი, ნახევარწრიული ლილვი. აქვს თაღოვანი სარკმელები სამხრეთის და აღმოსავლეთის კედლებზე. აღმოსავლეთის სარკმელს შემოვლებული აქვს მოჩუქურთმებული საპირე. სარკმლის მარჯვენა მხარეს ხუთსტრიქონიანი ასომთავრული წარწერაა, რომელშიც მოიხსენიება "მეფეთ მეფე გიორგი" და ეკლესიის ამშენებელი მექარვე. ეკლესიის ეზოში სამაროვანია გამართული, ჩრდილო-აღმოსავლეთით კი ნამოსახლარის ნაშთები შეინიშნება.

ექვთიმე თაყაიშვილის ვარაუდით, წარწერაში მოხსენიებული მეფე არის გიორგი I ან გიორგი II, რომლებიც XI საუკუნეში მოღვაწეობდნენ შესაბამისად ძეგლსაც XI საუკუნით ათარიღებს.