ბავრის ეკლესია

ბავრის ეკლესია სამცხე-ჯავახეთის მხარეში, ახალქალაქის მუნიციპალიტეტის სოფელ ბავრაში მდებარეობს. ტაძარი აგებულია X საუკუნეში, ადგილობრივი ფეოდალის - სოფრონის ბრძანებით. ნაგებობა დარბაზულია, სამხრეთით მიშენებული აქვს კარიბჭე. ეკლესია ნაგებია მონაცისფრო და მოწითალო ფერის ანდეზიტური ტუფის კარგად დამუშავებული კვადრებით. ნაგებობის აღმოსავლეთ ფასადზე გამოსახულია რელიეფი - დანიელი ლომების ხაროში. რელიეფის ქვეშ ასომთავრული წარწერაა: „ქრისტე ადიდე სოფრონ“. ასომთავრული წარწერა გვხვდება დასავლეთის ფასადზეც: „სახელითა ღმრთისაჲთა აეგო ესე ეკლესია წმიდაჲ სოფრონს ქონქოლს“. სწორედ ამ წარწერებიდან გახდა ცნობილი ტაძრის ამშენებლის, სოფრონ ქონქოლას ძის შესახებ. ეკლესიის ეზოში დაცულია რამდენიმე ძველი საფლავის ქვა.