ბედიანის ვარდისჭალის წმინდა გიორგის ეკლესია

ბედიანის ვარდისჭალის წმინდა გიორგის ეკლესია ქვემო ქართლის მხარეში, წალკის მუნიციპალიტეტის დაბა ბედიანში მდებარეობს. იგი დარბაზულ ეკლესიას წარმოადგენს, სამხრეთითა და დასავლეთით მინაშენებით. ეკლესიას ეტყობა გვიანდელი გადაკეთების კვალი. ტაძრის კედლებში ალაგ-ალაგ გვხვდება სხვადასხვა არქიტექტურული დეტალი, რომლებიც აშკარად გადაადგილებულია. ეკლესიას დასავლეთითა და აღმოსავლეთით სარკმლები აქვს. დასავლეთის სარკმელი უფრო დიდი ზომის ყოფილა და მოგვიანებით ამოუშენებიათ. აღმოსავლეთის სარკმლის თავზე გადაკეცილკიდეებიანი თავსართი და ჯვრის რელიეფია განთავსებული. სარკმელი აქვს მინაშენსაც. შესასვლელი სამხრეთიდანაა. სამხრეთის მინაშენს თაღოვანი შესასვლელი აქვს, თავად ეკლესიას კი არქიტრავული. საკურთხევლის იატაკი დარბაზის იატაკთან შედარებით ერთი საფეხურითაა ამაღლებული. ეკლესია ნაგებია რიყის ქვით.